धादिङको बेनीघाट रोराङमा अपाङ्गता भएका व्यक्तिहरूलाई मौरीपालन तालिम र मौरी सहितको घार वितरण

धादिङको बेनीघाट रोराङ गाउँपालिकाले अपाङ्गता भएका व्यक्तिहरूलाई मौरीपालन तालिम तथा मौरी सहितको घार वितरण गरिएको छ।

गाउँपालिकाको आर्थिक सहयोग र धादिङ नेत्रहीन संघको आयोजनामा सम्पन्न यो तालिम समुदायमा आधारित पुनर्स्थापना कार्यक्रमअन्तर्गत आयोजना गरिएको हो।

बेनीघाट रोराङ गाउँपालिकाका अध्यक्ष कृष्णबहादुर थपलिया (विवेक)का अनुसार, अपाङ्गता भएकाहरूलाई आत्मनिर्भर बनाउन व्यावसायिक सीप हस्तान्तरण गर्नु आवश्यक छ, र मौरीपालन जस्तो सीपले उनीहरूलाई आर्थिक सशक्तीकरणमा सहयोग पुर्‍याउनेछ।

यस तालिममा २० जना अपाङ्गता भएका व्यक्तिहरू सहभागी भएका थिए। अध्यक्ष थपलियाले अवसर र सही प्रशिक्षण पाएमा अपाङ्गता कुनै असक्षमता नभएको सन्देश दिन सकिन्छ भन्दै, आत्मनिर्भरताको मार्गमा अघि बढ्न यो कार्यक्रम प्रभावकारी हुने विश्वास व्यक्त गर्नुभयो। तालिमको प्रमुख आतिथ्यता अध्यक्ष थपलियाले गर्नुभएको थियो भने विशेष अतिथिको रूपमा उपाध्यक्ष टाप बहादुर श्रेष्ठ रहनुभएको थियो।

यो कार्यक्रम अपाङ्गता भएका व्यक्तिहरूका लागि व्यावसायिक अवसर सिर्जना गर्न र आर्थिक रूपमा सबल बनाउन महत्वपूर्ण योगदान दिनेछ।