बेनिघाट रोराङ गाउँपालिकालाई पूर्ण रूपमा बालमैत्री बनाउन अध्यक्ष थपलियाको प्रतिबद्धता

धादिङको बेनीघाट रोराङ गाउँपालिकामा सम्पन्न बालमैत्री स्थानीय शासनसम्बन्धी अभिमुखीकरण कार्यक्रमले गाउँपालिकालाई बालमैत्री बनाउने अभियानलाई थप गति दिने अपेक्षा गरिएको छ।

कार्यक्रम गाउँपालिका अध्यक्ष कृष्ण बहादुर थपलियाको अध्यक्षतामा सम्पन्न भयो, जहाँ जनप्रतिनिधि, विभिन्न शाखाका कर्मचारी, बालक्लबका प्रतिनिधिहरू, महिला समूह, शिक्षक, र सुरक्षाकर्मी गरी ७५ जनाको सहभागिता रहेको थियो।

अभिमुखीकरणको मुख्य उद्देश्य बालमैत्री स्थानीय शासनका नीति, कार्यान्वयन प्रक्रिया, तथा आवश्यक संरचनाहरूको बारेमा जानकारी गराउनु र गाउँपालिकामा बालमैत्री समिति गठन गर्नु थियो। कार्यक्रमपछि ३१ सदस्यीय बालमैत्री स्थानीय शासन गाउँपालिका समिति गठन गरियो, जसले बालबालिकासँग सम्बन्धित नीति तथा कार्यक्रमहरू कार्यान्वयनमा सहयोग गर्नेछ।

कार्यक्रममा प्रयास नेपाल धादिङका कार्यकारी निर्देशक दामोदर अर्यालले बालमैत्री स्थानीय शासन अवधारणा, बालबालिकामा लगानी, सेवा प्रवाहका ५१ सूचकहरू, तथा पालिका र वडास्तरीय संरचनाबारे सहजीकरण गर्नुभयो।

अध्यक्ष थपलियाले गाउँपालिकालाई पूर्ण रूपमा बालमैत्री स्थानिय तह घोषणा २०८३ साल मंसिर २० गते घोषणा गर्ने गरि सामुहिक  प्रतिबद्धता जनाएको समेत हाम्रो दैनिकलाई बताउनुभयो। साथै, प्रमुख प्रशासकीय अधिकृत नर्बदा घिमिरे, शिक्षा अधिकृत बोधराज पाठक, विभिन्न वडाध्यक्षहरू, महिला स्वयंसेविका तथा प्रहरी अधिकारीहरू सहभागी भई कार्यक्रम सफलतापूर्वक सम्पन्न भएको थियो।

यो कार्यक्रमले बालबालिकाको हितमा स्थानीय सरकारको ध्यान केन्द्रित गर्ने र नीति कार्यान्वयनमा बल पुर्‍याउने विश्वास गरिएको छ।