गजुरी:- ६ भानुभक्त माध्यमिक विद्यालय व्यवस्थापन समितिको अध्यक्षमा तामाङ निर्वाचित

गजुरी, धादिङ | चैत २६, २०८१ — गजुरी गाउँपालिका–६ स्थित भानुभक्त माध्यमिक विद्यालयमा एक विशेष कार्यक्रमको आयोजना गर्दै विद्यालय व्यवस्थापन समिति पुनर्गठन तथा अभिभावक भेला सम्पन्न गरिएको छ।

कार्यक्रम गजुरी गाउँपालिका वडा नं. ६ का अध्यक्ष भक्त ब. तामाङको अध्यक्षतामा सुरु भएको थियो। भने कार्यक्रममा गजुरी गाउँपालिकाका अध्यक्ष गणेशलाल श्रेष्ठको प्रमुख अतिथिका रूपमा सहभागी हुनुहुन्थ्यो। साथै, स्थानीय समाजसेवी, अभिभावक, शिक्षक-शिक्षिका, तथा विद्यार्थीहरूको उल्लेखनीय उपस्थिति रहेको थियो।

कार्यक्रममा विद्यालयको हालको शैक्षिक अवस्था, उपलब्ध साधन-स्रोत, विद्यार्थीहरूको उपस्थिति र उपलब्धि, भौतिक पूर्वाधारको अवस्था, तथा आगामी कार्ययोजनाहरूबारे विस्तृत छलफल गरिएको थियो। सहभागी अभिभावकहरूले विद्यालयको शैक्षिक गुणस्तर सुधारका लागि आफ्नो सुझाव र समर्थन व्यक्त गरेका थिए।

कार्यक्रमको विशेष उपलब्धिका रूपमा विद्यालय व्यवस्थापन समिति पुनर्गठन गरिएको छ। नयाँ समितिमा विभिन्न क्षेत्रबाट प्रतिनिधित्व गराई विद्यालयको सर्वांगीण विकासमा टेवा पुर्‍याउने अपेक्षा गरिएको छ।

समितिको पुनर्गठन: सर्वसम्मतिबाट नयाँ व्यवस्थापन समिति अध्यक्षमा गजुरी-६ का वडा अध्यक्ष भक्त बहादुर (कर्ण)तामाङ लाई दोस्रो पटक यस बिधालयमा निर्वाचित गराइएको हो।

गजुरी गाउँपालिका अध्यक्ष गणेशलाल श्रेष्ठले विद्यालयको पूर्वाधार विकास र गुणस्तरीय शिक्षाका लागि गाउँपालिकाको निरन्तर सहयोग गर्ने प्रतिबद्धता व्यक्त गर्नुभयो।

स्थानीय समाजसेवीहरूले आवश्यक शैक्षिक सामग्री, छात्रवृत्ति र भौतिक सुधारमा साथ दिने आश्वासन दिएका छन्।कार्यक्रमको अन्त्यमा विद्यालय प्रधानाध्यापकले सम्पूर्ण अतिथि, अभिभावक र सहभागीहरूलाई धन्यवाद ज्ञापन गर्दै विद्यालयको विकासमा सबैको निरन्तर सहयोगको अपेक्षा गर्नुभयो।