धादिङको चिसापानीमा प्रथम U-17 पुरुष फुटबल प्रतियोगिता सुरु

धादिङ, चैत २७ – नीलकण्ठ नगरपालिका वडा नम्बर २ स्थित चिसापानीमा प्रथम चिसापानी U-17 पुरुष फुटबल प्रतियोगिता आज एक विशेष समारोहका बीच सुरु भएको छ।

गणेशकुण्ड मैत्री युवा समाजको आयोजनामा सुरु भएको प्रतियोगितामा २१ टिम सहभागी भएका छन्।उद्घाटन समारोहको प्रमुख आतिथ्य जिल्ला खेलकुद विकास समितिका अध्यक्ष प्रताप सिं तामाङले गर्नुभयो।

उद्घाटन गर्दै उहाँले वर्तमान समयमा खेलकुदप्रति युवाको आकर्षण उल्लेखनीय रूपमा बढिरहेको भन्दै यस आकर्षणलाई निरन्तरता दिन स्थानीय सरकार र सरोकारवाला निकायहरूको सहकार्य अपरिहार्य रहेको बताउनुभयो।

“युवाहरूलाई सकारात्मक बाटोमा अघि बढाउन खेलकुदले महत्वपूर्ण भूमिका खेल्दछ,” उहाँले भन्नुभयो, “स्थानीय सरकारले यस्ता गतिविधिलाई प्राथमिकतामा राख्दै सहकार्य गर्न आवश्यक छ।”

प्रतियोगिताको उद्घाटन समारोहमा स्थानीय जनप्रतिनिधि, समाजसेवी, शिक्षक, अभिभावक, खेलप्रेमी तथा आयोजक संस्थाका पदाधिकारीहरूको उल्लेखनीय उपस्थिति रहेको थियो।

प्रतियोगिता आयोजक संस्थाका अध्यक्षले यस प्रतियोगिताबाट नवप्रवेशी खेलाडीहरूको क्षमता उजागर हुने विश्वास व्यक्त गर्दै प्रतियोगितालाई वार्षिक रूपमा निरन्तरता दिने प्रतिबद्धता जनाउनुभयो।

प्रतियोगिता केही दिनसम्म चल्नेछ र विजेता टिमलाई ट्रफी, प्रमाणपत्रसहित नगद पुरस्कार प्रदान गरिने आयोजकले जनाएको छ।