नेकपा एमाले बेलकोटगढी नगर कमिटीको दोस्रो अधिवेशन पौष १३ गते हुने

काठमाडौँ । नेकपा एमाले बेलकोटगढी नगरकमिटीको दोस्रो ऐतिहासिक अधिवेशन भाेलि (पौष १३) गते बेलकोटगढी नगरपालिका वडा नम्बर ७, महादेवफाँट रातमाटेमा हुने भएको छ।

अधिवेशनमा नेकपा एमाले का सचिव तथा पूर्वमन्त्री योगेश भट्टराई प्रमुख अतिथि रहनेछन्। नुवाकोट इन्चार्ज तथा पूर्वमन्त्री केशवराज पाण्डे विशेष अतिथिका रूपमा सहभागी हुने कार्यक्रम छ। साथै पार्टीका जिम्मेवार नेता एवं कार्यकर्ताहरूको उपस्थिति रहनेछ।

अधिवेशनका लागि विभिन्न वडाहरूमा प्रतिनिधि छनोटको प्रक्रिया सुरु भइसकेको छ। प्रतिनिधि छनोट प्रक्रियामा एकताका साथ सहभागी हुन राष्ट्रिय युवा सघ नेपालका सह-सचिव राममणी ढुंगानाले आह्वान गरेका छन्। उनले अधिवेशनलाई बिगतको समीक्षा गर्दै कमि–कमजोरी सच्याउने तथा भविष्यका नीति र कार्ययोजना निर्माण गर्ने अवसरका रूपमा लिनुपर्ने बताएका छन्।

ढुंगानाले वडास्तरमा विवाद होइन, गहन छलफल गरी सर्वसम्मत रूपमा प्रतिनिधि चयन गर्न आग्रह गरेका छन्। यदि सर्वसम्मति सम्भव नभए, प्रतिस्पर्धाबाट नेतृत्व चयन गर्ने पार्टीको लोकतान्त्रिक अभ्यासलाई आत्मसात गर्नुपर्ने उनले बताए।

पार्टी भित्रको प्रतिस्पर्धालाई व्यक्तिगत असहमतिको रूपमा नलिन ढुंगानाले अनुरोध गरेका छन्। प्रतिस्पर्धालाई क्षमता मापन र विकासको अवसरका रूपमा लिई अधिवेशनलाई सौहार्दपूर्ण रूपमा सम्पन्न गर्नुपर्नेमा उनले जोड दिए।